पुणे, मुंबई, ठाणे पोलीस व लोहमार्ग पोलीस भरतीत बोगस प्रमाणपत्राचा वापर
चार दिवसांपासून तिन्ही जिल्ह्याचे पोलीस पथक बीडमध्ये डेरेदाखल, काहींच्या संचीका ताब्यात; बोगसगिरी करणार्यात खळबळ
बीड (रिपोर्टर) बनावट प्रकल्पग्रस्त प्रमाणपत्राच्या आधारे पुणे, मुंबई, ठाणे आणि गडचिरोली पोलीस व लोहमार्ग पोलीस भरतीत बीड जिल्ह्यातील काही तरुणांनी नोकरी मिळवल्याचा संशय आल्याने गेल्या चार दिवसांपासून मुंबई, ठाणे आणि पुणे येथील पोलीस बीडमध्ये डेरेदाखल असून जिल्हा पुनर्वसन कार्यालयात संबंधित उमेदवारांच्या संचीका ताब्यात घेत तपासणी करत असल्याने बोगस प्रमाणपत्राच्या आधारे नोकरी मिळवलेल्यांमध्ये प्रचंड खळबळ उडाली आहे.
पोलीस भरती प्रक्रियेत बोगस प्रमाणपत्राच्या आधारे बीड जिल्ह्यातील काही तरुणांनी नोकरी मिळवल्याचा संशय संबंधित यंत्रणेला आला आहे. सर्वप्रथम गडचिरोली येथील पोलिसांना हा संशय आला होता. गेल्या पंधरा ते वीस दिवसांपूर्वी तेथील पथक बीडमध्ये डेरेदाखल झाले होते. तेव्हा सत्तार शेख नावाचा दलाल आणि घोलप नावाचा वकील त्या पथकाने ताब्यात घेतला होता. त्याच दरम्यान पुणे लोहमार्ग पोलीस भरती, पुणे पोलीस भरती, मुंबई लोहमार्ग पोलीस भरती, मुंबई पोलीस भरती व ठाणे पोलीस भरती प्रक्रिया झालेली आहे. या भरती प्रक्रियेत बीडमधील तरुणांनी बोगस प्रकल्पग्रस्ताचे प्रमाणपत्र काढून त्या आधारे नोकरी मिळवल्याचा संशय मुंबई, पुणे, ठाणे येथील यंत्रणेला झाल्यानंतर गेल्या चार दिवसांपासून या तिन्ही ठिकाणचे पोलीस पथक बीडमध्ये डेरेदाखल असल्याचे सांगण्यात येते. प्रकल्पग्रस्ताचे बोगस प्रमाणपत्र काढणार्या आणि त्यांना मदत करणार्या लोकांचा शोध संबंधित पथक घेत असून जिल्हा पुनर्वसन कार्यालयातून काहींच्या संचीका ताब्यात घेतल्याचे सुत्रांचे सांगणे आहे. या पाचही भरतींमध्ये बीड जिल्ह्यातून शेकडो तरुणांनी भाग घेतला होता. त्यामध्ये काही तरुणांना नोकरी मिळाली आहे. मात्र ते किती तरुण आहेत हे अद्याप समजू शकले नाही. जे पथके बीडमध्ये डेरेदाखल आहेत त्या पथकांनी गेल्या चार दिवसाच्या कालखंडात कोणाला ताब्यात घेतले का याबाबतही माहिती उपलब्ध नसली तरी प्रकल्पग्रस्तांचे बोगस प्रमाणपत्र मोठ्या प्रमाणावर बीडमधून वितरीत झाल्याचे सांगण्यात येते. या पथकाच्या तपासामुळे बोगस प्रकल्पग्रस्ताचे प्रमाणपत्र काढणार्यांमध्ये आणि ते काढून देणार्या दलालांमध्ये प्रचंड खळबळ उडाली आहे.