बीड (रिपोर्टर)- नगर नाका भागातील मोरया नावाच्या मेडीकल दुकानाला अचानक रात्री दोन वाजता आग लागली. या आगीत हे दुकान फर्निचरसह जळून खाक झाले. दुकानात असलेला पंधरा लाखांचा माल आणि दुकानाच्या गल्ल्यातील दुकानाचे किराया, नोकराचा पगार असा एकूण 30 ते 40 हजार रुपयांची रोकडही जळाली आहे.
नगरनाका भागामध्ये नित्यानंद शिंदे यांचे मोरया नावाचे मेडिकल दुकान आहे. विद्युत कनेक्शनमधील वायर लूज असल्यामुळे रात्री दोनच्या दरम्यान या दुकानाला आग लागली. दुकान नगर रोडवर असल्यामुळे ही बाब रस्त्यावरून जाणार्या येणार्या पादचार्यांच्या लक्षात आली. नाक्यावर असलेल्या एक-दोन दवाखान्यातील लोकांना याबाबत कळविल्यानंतर दुकानाच्या पाटीवर असलेल्या दुकान मालकाच्या नंबरवर संपर्क साधण्यात आला. दुकानाचे मालक आणि अग्निशामक दलाची गाडी येईपर्यंत जवळपास हे मेडिकल दुकान आणि त्यातील माल जळून खाक झाला होता. दुकानात केलेले काचेचे फर्निचरही आगीमुळे फुटले होते. या आगीमध्ये जवळपास दहा ते पंधरा लाकांचे नुकसान झाले आहे.
नगरपालिकेच्या अग्निशामक दलाच्या गाडीला चालक नाही म्हणून गाडी येण्यास एक तास उशीर झाला. दुकान मालक आणि येथे जमलेल्या काही नागरीकांनी अग्निशामक दलाला दुरध्वनीवरून संपर्क साधला असता अर्धा तास उलटून गेला तरी आग विझविण्यासाठी गाडी येत नसल्याने मेडीकल दुकानदाराच्या शेजारील इतर दुकानदारांनी अग्निशामक दल या ठिकाणी प्रत्यक्ष नाव घेऊन तात्काळ गाडी घेऊन या अशी विनंती करत होते मात्र येथे उपस्थित असलेले कर्मचारी गाडीमध्ये पाणी आहे मात्र या गाडीसाठी चालक नाही, जो ड्रायव्हर आहे तो बदली ड्रायव्हर आहे तो येईपर्यंत आम्हाला काहीच करता येत नाही, असे म्हटल्यानंतर जवळपास तास ते दीड तासाने ही अग्निशामक दलाची गाडी उशीरा आल्यानेच मेडिकल दुकान जळून खाक झाली.