माजलगाव-पात्रुड रस्त्यावर दिवसाढवळ्या घडली घटना
माजलगाव (रिपोर्टर) ऊसाचे आलेले पैसे बँकेतून काढून घरी घेवून जात असताना दोघा बंधूंच्या डोळ्यात चटणी टाकून मारहाण करत त्यांच्याकडील सव्वा तीन लाख रूपयाची बॅग लुटून नेल्याची खळबळजनक घटना आज माजलगाव पाथ्रुड रोडवर घडली. शेतकर्‍यांना लुटणारे तिघेजण मोटारसायकलवर आले होते. याप्रकरणी गुन्हा दाखल होवून चोरट्यांचा पोलिस शोध घेत आहेत.
गजानन बाजीराव कोळसे व जनार्दन कोळसे (दोघे रा.लोनगाव ता.माजलगाव) यांचे ऊसाचे पैसे पूर्णवादी बँकेमध्ये जमा झाले होते. पैसे काढून ते दोघे गावाकडे जात होते. माजलगाव-पाथ्रुड रस्त्यावर त्यांना तिघाजणांनी अडवून त्यांच्या डोळ्यात चटणी टाकून त्यांना मारहाण करून त्यांच्याजवळील 3लाख 25 हजार रूपयाची बॅग पळवून नेली. दिवसाढवळ्या ही घटना घडल्याने माजलगाव तालुक्यात एकच खळबळ उडाली. याप्रकरणी माजलगाव पोलिस ठाण्यामध्ये गुन्हा दाखल झाला असून याप्रकरणाचा अधिक तपास पोलिस करत आहेत.
