माजलगाव (रिपोर्टर): विजेच्या लपंडावाने थकलेल्या शेतकर्यांनी शेतातील पिकांना वेळेत पाणी मिळावं यासाठी शेतात सोलारपंप लावले आहेत. मात्र आता इथे चोरट्यांनी सोलार पंपच्या प्लेटांना लक्ष्य करत त्या चोरून नेत असून माजलगाव तालुक्यातील पवारवाडी शिवार व लिंबगाव शिवार येथून दोन शेतकर्यांच्या 19 सोलार प्लेटा चोरून नेल्या. त्याची बाजारात 95 हजार एवढी किंमत आहे. या प्रकरणी शेतकर्यांच्या फिर्यादीवरून अज्ञात चोरट्यांविरोधात गुन्हा दाखल करण्यात आला आहे.
माजलगाव शहरातील जुना मोंढा भागात राहणारे अशोक सुखदेव खामकर यांचे शहरापासून काही अंतरावर असलेल्या पवारवाडी शिवारामध्ये शेत आहे. शेतातील पिकांना वेळेत पाणी देण्यासाठी वीज कंपनीच्या भरवश्यावर न राहता त्यांनी शेतात सोलार पंप उभे केले. मात्र परवा रात्री अज्ञात चोरट्यांनी निर्मला सोलार सोल्युशन कंपनीच्या पंपाच्या दहा सोलार प्लेट तर अन्य एका शेतकर्याचे 9 सोलार प्लेट अज्ञात चोरट्यांनी चोरून नेल्या. बाजारात याची किंमत 95 हजाराच्या आसपास आहे. ऐन हंगामात चोरट्यांनी सोलार प्लेट चोरून नेल्यामुळे शेतकर्यांचे पंप बंद पडले आहेत. या प्रकरणी अशोक खामकर यांनी माजलगाव ग्रामीण ठाण्यात दिलेल्या फिर्यादीवरून अज्ञात चोरट्याविरोधात कलम 379 नुसार गुन्हा दाखल करण्यात आला आहे.