बीड/शिरूर (रिपोर्टर): हॅलो… ग्रामसेवक साहेब, पंधराव्या वित्त आयोगाच्या निधीमध्ये तब्बल 13 लाख रुपयांचा अपहार झाल्याची तक्रार जिल्हा परिषदेचे मुख्य कार्यकारी अधिकारी यांच्याकडे आली आहे. त्यात तथ्य आहे का? असा सवाल विचारणार्याला थेट हो, खाल्ले, असे निगरगट्टपणे उत्तर देत आमचे कोणीही काहीच वाकडे करू शकत नाही, या तोर्यात ग्रामसेवक प्रशासक काळात भ्रष्टाचार करत असल्याचे शिरूर तालुक्यातल्या मौजे तागडगावात उघडकीस आले आहे. कुठलेही साहित्य खरेदी न करता तब्बल 13 लाख रुपयांचा भ्रष्टाचार प्रशासक करंजवणकर व ग्रामसेवक हेमाडे यांनी केला आहे आणि त्या भ्रष्टाचाराबाबत हेमाडे नामक ग्रामसेवकाने निधी खाल्ला, असे स्पष्ट कबुल केल्याचा ऑडीओ व्हायरल झाला आहे.
शिरूर तालुक्यातील तागडगाव ग्रामपंचायतीवर प्रशासकाची नेमणूक असताना ग्रामपंचायतीला आलेल्या निधीचा सर्रास गैरवापर झाला आहे. प्रशासक म्जहणून करंजवणकर व ग्रामपंचायतीचे ग्रामसेवक हेमाडे हे काम पाहत होते. त्यावेळी दोघांनी संगनमत करून पंधराव्या वित्त आयोगातील 13 लाख रुपयांपर्यंतचा अपहार कसल्याही प्रकारचे साहित्य खरेदी न करता केला. एएसके च्या नावाखाली एप्रिलमध्ये 2 लाख 46 हजार 910 रुपये उचलून अपहाराची सुरुवात केली. पुढे जुलैमध्ये पाणी पुरवठा साहित्य खरेदी, पाणी पुरवठा व स्वच्छता, अंगणवाडी फिल्टर व इतर साहित्य खरेदी, शाळेसाठी डस्टबीन, जिल्हा परिषद शाळेसाठी फिल्टर व साहित्य खरेदी, पाणीपुरवठा व स्वच्छता, एलईडी स्ट्रीट लाईट, पाणीपुरवठा व स्वच्छता एलईडी खरेदी या नावाखाली 12 लाख 99 हजार 854 रुपये खर्च दाखवून अपहार केल्याचे तेव्हा उघडकीस आले जेव्हा जिल्हा परिषद केंद्रीय प्राथमिक शाळेच्या मुख्याध्यापकांनी फिल्टर, खिडक्यांना जाळ्या बसवणे, कचरा कुंडी यासह अन्य साहित्य शाळेत उपलब्ध नाहीत, असे लेखी तक्रारदाराला दिले. एवढा मोठा भ्रष्टाचार केल्यनातंर हेमाडे ग्रामसेवकाला याबाबत रिपोर्टरने विचारले असता त्याने थेट हो खाल्ले, असे उत्तर दिले. या प्रकरणी कृष्णा पांडुरंग डोंगरे यांनी जिल्हा परिषदेच्या मुख्य कार्यकारी अधिकारी यांच्याकडे लेखी स्वरुपात तक्रार केली असून याची दखल घेत सर्रासपणे भ्रष्टाचार केल्याचा होकार देणार्या ग्रामसेवकासह संबंधित तत्कालीन प्रशासकावर गुन्हा दाखल करावा, अशी मागणी होत आहे.