बीड (रिपोर्टर): संपर्क नेत्यांची निवड केल्यानंतर आता शिवसेना उद्धव बाळासाहेब पक्षाने जिल्ह्यात मोठे फेरबदल करत तीन जिल्हाप्रमुखांची नियुक्ती केली आहे. बीड जिल्ह्यात ‘उबाठा’ सेनेचे नवीन जिल्हाप्रमुख म्हणून परमेश्वर सातपुते, गणेश वरेकर, रत्नाकर शिंदे यांची नियुक्ती केली असून सहसंपर्कप्रमुख म्हणून तत्कालीन जिल्हाप्रमुख अनिल जगताप यांच्यासह माजी आ. बदामराव पंडित आणि बाळासाहेब अंबुरे यांच्यावर जबाबदारी सोपविण्यात आली आहे.
जिल्ह्यात आतापर्यंत शिवसेनेचे पूर्व व पश्चिम असे दोनच जिल्हाप्रमुख असायचे. दोघांकडे प्रत्येकी तीन मतदार संघाची जबाबदारी होती. परंतू मागील काही दिवसांपासून एक पद रिक्त होते. त्यामुळे बीडचे जिल्हाप्रमुख अनिल जगताप यांच्याकडेच सर्व जिल्ह्याची जबाबदारी देण्यात आली होती. जगताप यांच्याकडून पक्ष वाढीसाठी बैठका, गाठीभेटी सुरू असतानाच शुक्रवारी नवीन जिल्हाप्रमुखांच्या निवडी करण्यात आल्या आहेत. तसेच तीन सहसंपर्क प्रमुखही निवडले आहेत. पक्षप्रमुख उद्धव ठाकरे यांच्या आदेशावरून या निवडी जाहिर झाल्या आहेत.
कोणाकडे कोणती जबाबदारी
अनिल जगताप – सहसंपर्क प्रमुख – बीड व गेवराई
बदामराव पंडित – सहसंपर्क प्रमुख गेवराई व आष्टी
बाळासाहेब अंबुरे – केज व परळी
गणेश वरेकर – जिल्हाप्रमुख – बीड व माजलगाव
परमेश्वर सातपुते – जिल्हाप्रमुख – गेवराई व आष्टी
रत्नाकर शिंदे – जिल्हाप्रमुख – केज व परळी
निजाम शेख – शहर प्रमुख – बीड