अंबाजोगाई (रिपोर्टर) डेमोक्रॅटिक युथ फेडरेशन ऑफ इंडिया (डीवायएफआय) आणि स्टुडंट्स फेडरेशन ऑफ इंडिया (एसएफआय) च्यावतीने केंद्र सरकारच्या अग्निपथ योजनेच्या विरोधात अंबाजोगाई उपजिल्हाधिकारी कार्यालयावर तीव्र निदर्शने करण्यात आली. सैन्य भरतीत कंत्राटी पद्धती आणणार्या भाजपच्या केंद्र सरकार विरोधात डीवायएफआय – एसएफआय तर्फे देशभरात हे आंदोलन करण्यात येत आहे.
यावेळी उपजिल्हाधिकारी यांच्यामार्फत प्रधानमंत्री यांना पाठवण्यात आलेल्या निवेदनात डीवायएफआय – एसएफआयने म्हटले आहे की, केंद्र सरकारने अलीकडेच जाहीर केलेली नवीन लष्कर भरती अग्निपथ योजना ही देशासाठी आपत्ती आणि भारताच्या सार्वभौमत्वाला धोका आहे. सरकारने गेल्या दोन वर्षांपासून नियमित लष्करी भरती केली नाही. त्यामुळे 2021 पर्यंत भारतीय सैन्यात 1 लाख 4 हजार 653 जवानांची कमतरता होती. ही पदे भरण्याऐवजी सरकारने आता प्रादेशिक कोटा पूर्णपणे काढून टाकण्याचा आणि 6 महिन्यांच्या प्रशिक्षण कालावधीसह चार वर्षांच्या अल्पकालीन अग्निपथ भरती योजना लागू करण्याचा निर्णय घेतला आहे. चार वर्षानंतर सुमारे तीन चतुर्थांश (35 हजार) सैनिक पेन्शन किंवा ग्रॅच्युइटीशिवाय निवृत्त होतील.
डीवायएफआय आणि एसएफआय देशाच्या सार्वभौमत्वावरील व भारतीय लोकांवरील, तसेच स्वातंत्र्यावरील भांडवलदारी हल्ल्यांचा तीव्र विरोध करत असून भारताचे सार्वभौमत्व व अखंडता धोक्यात आणणारी, सशस्त्र दलांमधील स्थैर्य धोक्यात आणणारी फसवी अग्निपथ योजना तात्काळ रद्द करण्याची आणि सशस्त्र दलांमध्ये पूर्वी प्रमाणेच नियमित सैन्य भरती करण्याची मागणी करत आहे. या आंदोलनात डीवायएफआयचे जिल्हा सचिव विशाल देशमुख, सुहास चंदनशिव,देविदास जाधव,हनुमान शिंदे,मोनाज देशमुख, प्रशांत मस्के,प्रशांत कोकाटे, जगन्नाथ पाटोळे,अंकुश कोकाटे,राम गडदे, सिद्राम सोळंके,सारंग भगत,विजय घुगे सह शेकडो युवक सहभागी झाले होते.
